திருப்புகலூர் வர்த்தமானீச்சரம் ஸ்ரீ வர்த்தமானேஸ்வரர் கோயில் காவிரித் தென்கரையின் 129 தலங்களில் 76-வது · சோழ நாடு

திருஞானசம்பந்தர் இக்கோயிலுக்கு வந்து இப்பதிகத்தைப் பாடினார். பாடல் 1 / 11.

பாடலும் ஒலிபெயர்ப்பும் கட்டுரையில் உள்ளபடி. சொற்பொருளும் பொருளுரையும் AI உதவியுடன் எழுதிய வரைவுகள்.

பதினொரு பாடல்கள்

1. 01

   பட்டம் பால்நிற மதியம் படர்சடைச் சுடர்விடு பாணிநட்டம் நள்ளிருள் ஆடும் நாதனார் நவின்றுறை கோயில்புட்டன் பேடையொ டாடும் பூம்புக லூர்த்தொண்டர் போற்றிவட்டஞ் சூழ்ந்தடி பரவும் வர்த்தமா னீச்சரத் தாரே

   ஆண் பறவைகள் தன்பிணையோடு கூடி மகிழும் அழகிய புகலூரில் அடியவர்கள் வட்டமாகச் சூழ்ந்து திருவடிகளைப் போற்றிப் பரவும் வர்த்தமானீச்சரத்து இறைவர் திருமேனிமேல் உத்தரீயமும் விரிந்த சடைமேல் வெண்மதி ஒளிதரும் கங்கை ஆகியவற்றையும் கொண்டு நள்ளிருளில் நட்டமாடும் தலைவர் ஆவார். அவர் கோயில் திருப்புகலூர்வர்த்தமானீச்சரம் ஆகும்.

2. 02

   முயல்வ ளாவிய திங்கள் வாண்முகத் தரிவையில் தெரிவைஇயல்வ ளாவிய துடைய இன்ன முதெந்தையெம் பெருமான்கயல்வ ளாவிய கழனிக் கருநிறக் குவளைகள் மலரும்வயல்வ ளாவிய புகலூர் வர்த்தமா னீச்சரத் தாரே

   கயல்கள் நிறைந்த கழனிகளில் கரிய நிறக் குவளைகள் மலரும் வயல்களை உடைய புகலூர் வர்த்தமானீச்சரத்து இறைவர், முயற்கறை பொருந்திய திங்கள் போன்ற ஒளிபொருந்திய முகத்தினை உடைய மங்கையரில் மேம்பட்ட தெரிவையாகிய உமையம்மையைப் பாகமாக உடைய இனிய அமுதம் போன்றவர். எமக்குத் தந்தையாகவும் தலைவராகவும் விளங்குபவர்.

3. 03

   தொண்டர் தண்கயம் மூழ்கித் துணையலுஞ் சாந்தமும் புகையும்கொண்டு கொண்டடி பரவிக் குறிப்பறி முருகன்செய் கோலம்கண்டு கண்டுகண் குளிரக் களிபரந் தொளிமல்கு கள்ளார்வண்டு பண்செயும் புகலூர் வர்த்தமா னீச்சரத் தாரே

   தொண்டர்கள் குளிர்ந்த நீர் நிலைகளில் மூழ்கி மலர் மாலை சாந்து, மணப்புகை கொண்டு திருவடிப்பரவி வழிபடக் கண்டு அவர்தம் குறிப்பறிந்து அவர்கட்கு உதவும் முருகநாயனார் தாமும் அவ்வாறே இறைவனை அலங்கரித்துக் கண்குளிரக் கண்டு மகிழுமாறு வண்டுகள் கள்ளுண்டு பண்செய்யும் ஒலிபோல ஒலிக்கும். வர்த்த மானீச்சரத்துள் சிவபெருமான் உகந்தருளியுள்ளார்.

4. 04

   பண்ண வண்ணத்த ராகிப் பாடலொ டாட லறாதவிண்ண வண்ணத்த ராய விரிபுக லூரரொர் பாகம்பெண்ண வண்ணத்த ராகும் பெற்றியொ டாணிணை பிணைந்தவண்ண வண்ணத்தெம் பெருமான் வர்த்தமா னீச்சரத் தாரே

   விரிந்த பரப்புடைய புகலூர் வர்த்தமானீச்சரத்து இறைவர், பாடல் ஆடல்களில் பயிலும் பண்ணிசை மயமானவரும், ஆகாய வடிவினராய் விளங்குபவரும், பெண்ணொர் பாகமான வடிவினரும், ஆணொடு இணைந்த அரி அர்த்த வடிவினரு மானவர்.

5. 05

   ஈசன் ஏறமர் கடவுள் இன்னமு தெந்தையெம் பெருமான்பூசு மாசில்வெண் ணீற்றர் பொலிவுடைப் பூம்புக லூரில்மூசு வண்டறை கொன்றை முருகன்முப் போதுஞ்செய் முடிமேல்வாச மாமல ருடையார் வர்த்தமா னீச்சரத் தாரே

   அழகிய புகலூரில் முருகநாயனார் வண்டுகள் மொய்க்கும் கொன்றை மலர் கொண்டு மூன்று பொழுதிலும் வழிபட அம் மண மலர்களோடு விளங்கும் வர்த்தமானீச்சரத்து இறைவர் எல்லோர்க்கும் தலைவர். விடையேறு உடையவர். இனிய அமுதம் போன்றவர். எந்தை, எம்பெருமான் குற்றம் அற்ற வெண்ணீறு பூசியவர்.

6. 06

   தளிரி ளங்கொடி வளரத் தண்கயம் இரிய வண்டேறிக்கிளரி ளம்முழை நுழையக் கிழிதரு பொழிற்புக லூரில்உளரி ளஞ்சுனை மலரும் ஒளிதரு சடைமுடியதன்மேல்வளரி ளம்பிறை யுடையார் வர்த்தமா னீச்சரத் தாரே

   குளிர்ந்த நீர் நிலைகளை அடுத்து வளரும் இளங்கொடிகளின் தளிர்கள் கிழியுமாறு வண்டுகள் சரேலென எழுந்து முழைகள்தோறும் செல்லும் பொழில்கள் சூழ்ந்த புகலூரில் வாழ்பவர் சுனை நீரில் பூத்த மலர்கள் விளங்கும் சடைமுடியில் பிறை சூடியவராகிய வர்த்தமானீச்சரத்து இறைவர்.

7. 07

   தென்சொல் விஞ்சமர் வடசொல் திசைமொழி யெழில்நரம்பெடுத்துத்துஞ்சு நெஞ்சிருள் நீங்கத் தொழுதெழு தொல்புக லூரில்அஞ்ச னம்பிதிர்ந் தனைய அலைகடல் கடைய அன் றெழுந்தவஞ்ச நஞ்சணி கண்டர் வர்த்தமா னீச்சரத் தாரே

   அடியவர் தமிழிலும் வடமொழியிலும் திசை மொழிகளிலும் அழகிய யாழ் நரம்பை மீட்டித் தங்கள் மனத்திருள் நீங்கப்பாடித் தொழும் புகலூரில், அன்று அலைகடலைக் கடந்த போது, மை பிதிர்ந்தாற்போல எழுந்த வஞ்ச நஞ்சினை உண்ட அழகிய கண்டத்தினராய் விளங்குபவர் வர்த்தமானீச்சரத்து இறைவர்.

8. 08

   சாம வேதமொர் கீதம் ஓதிஅத் தசமுகன் பரவும்நாம தேயம துடையார் நன்குணர்ந் தடிகளென் றேத்தக்காம தேவனை வேவக் கனலெரி கொளுவிய கண்ணார்வாம தேவர்தண் புகலூர் வர்த்தமா னீச்சரத் தாரே

   தண்மையான புகலூரில் விளங்கும் வர்த்தமானீச்சரத்து இறைவர். இராவணன் சாம வேதம் பாடிப் பரவும் பெயரையும் ஊரையும் உடையவர். நன்குணர்ந்து அடிகள் என்றேத்தும் பெயர்களை உடையவர். காமதேவனை எரித்த கண்ணையுடையவர்.

9. 09

   சீர ணங்குற நின்ற செருவுறு திசைமுக னோடுநார ணன்கருத் தழிய நகைசெய்த சடைமுடி நம்பர்ஆர ணங்குறும் உமையை அஞ்சுவித் தருளுதல் பொருட்டால்வார ணத்துரி போர்த்தார் வர்த்தமா னீச்சரத் தாரே

   வர்த்தமானீச்சரத்து இறைவர், சிறந்த தெய்வத் தன்மை உடையவர்களாய் யார் தலைவர் என்பதில் மாறுபட்டவர்களாய்த் தம்முட் செருச்செய்த திருமால் பிரமர்களின் கருத்தழியுமாறு அவர்களிடையே தோன்றி நகை செய்தவர். உமையம்மையை அஞ்சுவிக்கும்பொருட்டு அவள் எதிரே யானையை உரித்தவர்.

10. 10

    கையி லுண்டுழல் வாருங் கமழ்துவ ராடையி னால்தம்மெய்யைப் போர்த்துழல் வாரும் உரைப்பனமெய்யென விரும்பேல்செய்யில் வாளைகளோடு செங்கயல் குதிகொளும் புகலூர்மைகொள் கண்டத்தெம் பெருமான் வர்த்தமா னீச்சரத் தாரே

    வாளைமீன்களோடு கயல்கள் குதித்து விளையாடும் வயல்களைக் கொண்ட புகலூல் நீல கண்டராய் விளங்கும் வர்த்தமானீச்சரத்து இறைவர் புகழே மெய்ம்மமையானவை. கையில் உணவு ஏற்று உண்ணும் சமணரும் துவராடை போர்த்த புத்தரும் கூறும் உரைகளை மெய்யெனக் கருதேல்.

11. 11

    பொங்கு தண்புனல் சூழ்ந்து போதணி பொழிற்புக லூரில்மங்குல் மாமதி தவழும் வர்த்தமா னீச்சரத் தாரைத்தங்கு சீர்திகழ் ஞானச ம்பந்தன் தண்டமிழ் பத்தும்எங்கும் ஏத்தவல் லார்கள் எய்துவர் இமையவ ருலகே

    இப்பதிகப் பாடல்களை எவ்விடத்தும் பாடிப் போற்றுபவர்கள் வானவர் உலகை அடைவார்கள் என்று இறுதிப் பாடலில் ஞானசம்பந்தர் கூறுகிறார்.

    மிகுதியான தண்ணிய நீராலும், மலர்பூத்த பொழில்களாலும் சூழப்பெற்று விளங்கும் புகலூரில் வானளாவிய வர்த்தமானீச்சரத் திருக்கோயிலில் விளங்கும் இறைவரைப் புகழ்மிக்க ஞானசம்பந்தன் போற்றிப் பாடிய பாடல்கள் பத்தையும் எவ்விடத்தும் பாடி ஏத்துவார் இமையவர் உலகம் எய்துவர்.