திருத்தேவூர் ஸ்ரீ தேவகுருநாதசுவாமி கோயில் காவிரித் தென்கரையின் 129 தலங்களில் 85-வது · சோழ நாடு

திருஞானசம்பந்தர் இக்கோயிலுக்கு வந்து இப்பதிகத்தைப் பாடினார். 11 பாடல்களில் பாடல் 1.

பாடலும் ஒலிபெயர்ப்பும் கட்டுரையில் உள்ளபடி. சொற்பொருளும் பொருளுரையும் AI உதவியுடன் எழுதிய வரைவுகள்.

பதினொரு பாடல்கள்

1. 01

   பண்ணி லாவிய மொழியுமை பங்கனெம் பெருமான்விண்ணில் வானவர் கோன்விம லன்விடை யூர்திதெண்ணி லாமதி தவழ்தரு மாளிகைத் தேவூர்அண்ணல் சேவடி யடைந்தனம் அல்லலொன் றிலமே

   இனிய மொழியினளாகிய உமையம்மை பங்கனும், எம்தலைவனும், விண்ணுலகில் வாழும் வானவர் தலைவனும், குற்றமற்றவனும், விடையூர்தியும், ஆகிய, தௌந்த நிலவொளியைத் தரும் மதிதவழும் மாளிகைகளைக் கொண்ட தேவூரில் விளங்கும் அண்ணலின் சேவடிகளை நாம் அடைந்துள்ளோம். ஆதலால் நாம் அல்லல்கள் இலராயினோம்.

2. 02

   ஓதி மண்டலத் தோர்முழு துய்யவெற் பேறுசோதி வானவன் துதிசெய மகிழ்ந்தவன் தூநீர்த்தீதில் பங்கயந் தெரிவையர் முகமலர் தேவூர்ஆதி சேவடி யடைந்தனம் அல்லலொன் றிலமே

   நிலவுலகில் வாழ்வோர் ஓதிஉய்ய, உதயகிரியில் ஏறிவரும் கதிரவனால் வழிபடப்பட்ட வானவர் தலைவனாய் விளங்குவோனும், தன்னைத் துதிப்பாரைக் கண்டு மகிழ்ந்து உடனே அருள் புரிபவனும், ஆகிய குற்றமற்ற தாமரை மலர்கள் மகளிர்முகம் போல மலரும் சிறப்பினதாகிய தேவூரில் விளங்கும் முழுமுதற் கடவுளின் திருவடிகளை நாம் அடைந்துள்ளோம். ஆதலால் நாம் அல்லல்கள் சிறிதும் இலராயினோம்.

3. 03

   மறைக ளான்மிக வழிபடு மாணியைக் கொல்வான்கறுவு கொண்டவக் காலனைக் காய்ந்தவெங் கடவுள்செறுவில் வாளைகள் சேலவை பொருவயல் தேவூர்அறவன் சேவடி யடைந்தனம் அல்லலொன் றிலமே

   “Maṟaika ḷāṉmika vazhipaṭu māṇiyaik kolvāṉ

   kaṟuvu koṇṭavak kālaṉaik kāynthaveṅ kaṭavuḷ

   seṟuvil vāḷaikaḷ sēlavai poruvayal thēvūr

   aṟavaṉ sēvaṭi yaṭainthaṉam allaloṉ tṟilamē”.

   வேதவிதிப்படி மிக்க வழிபாடுகளை இயற்றிய மார்க்கண்டேயான் உயிரைக் கவர்தற்குச் சினந்து வந்த காலனைக் காய்ந்த கடவுளும், சேற்றில் வாழும் வாளைமீன்களும் சேல்களும் சண்டையிடுகின்ற வயல்களை உடைய தேவூரில் விளங்கும் அறவனும் ஆகிய சிவபிரான் திருவடிகளை நாம் அடைந்துள்ளோம். ஆதலால் நாம் அல்லல்கள் சிறிதும் இலராயினோம்.

4. 04

   முத்தன் சில்பலிக் கூர்தொறும் முறைமுறை திரியும்பித்தன் செஞ்சடைப் பிஞ்ஞகன் தன்னடி யார்கள்சித்தன் மாளிகை செழுமதி தவழ்பொழில் தேவூர்அத்தன் சேவடி யடைந்தனம் அல்லலொன் றிலமே

   பாசங்களின் இயல்பாகவே விடுபட்டவனும், சிலவாக இடும் உணவுக்கு ஊர்கள் தோறும் முறையாகப் பலியேற்கும் பித்தனும், சிவந்தசடையைக் கொண்டுள்ள பிஞ்ஞகனும், தன் அடியவர்களின் சித்தத்தில் எழுந்தருளியிருப்பவனும் ஆகிய மாளிகைகளையும், மதிதவழும் பொழில்களையும் உடைய தேவூர்ப்பெருமான் திருவடிகளை நாம் அடைந்துள்ளோம். ஆதலால் அல்லல்கள் சிறிதும் இலரானோம்.

5. 05

   பாடு வாரிசை பல்பொருட் பயன்உகந் தன்பால்கூடு வார்துணைக் கொண்டதம் பற்றறப் பற்றித்தேடு வார்பொரு ளானவன் செறிபொழில் தேவூர்ஆடு வானடி யடைந்தனம் அல்லலொன் றிலமே

   இசைபாடுபவர்க்கும், பல்பொருள் பயனாக அவன் இருத்தலை அறிந்துணர்ந்து அன்போடு கூடுவார்க்கும், உலகில் துணையாகக் கொண்டுள்ளவர்கள் மேல் செலுத்தும் பற்றுக்களை விட்டு அவனையே பற்றித் தேடுவார்க்கும் பொருளாயிருப்பவனும், செறிந்த பொழில்களை உடைய தேவூரில் நடனம் புரிபவனுமாகிய சிவபிரான் திருவடிகளை அடைந்தோம். ஆதலால் அல்லல்கள் இலரானோம்.

6. 06

   பொங்கு பூண்முலைப் புரிகுழல் வரிவளைப் பொருப்பின்மங்கை பங்கினன் கங்கையை வளர்சடை வைத்தான்திங்கள் சூடிய தீநிறக் கடவுள்தென் தேவூர்அங்க ணன்றனை அடைந்தனம் அல்லலொன் றிலமே

   கிளர்ந்து எழுந்த அணிகலன் பூண்டுள்ள தனங்களையும், நெறிந்த கூந்தலையும், வரிவளையல்களையும் கொண்டுள்ள மலைமங்ககை பங்கினனும், கங்கையை வளர்ந்த சடைமீது வைத்தவனும், திங்கள் சூடியவனும், தீப்போன்ற செந்நிறமுடைய கடவுளும் ஆகிய, அழகிய தேவூரில் எழுந்தருளிய அழகிய கருணை யாளனை அடைந்தோம். ஆதலால் அல்லல்கள் சிறிதும் இலரானோம்.

7. 07

   வன்பு யத்தவத் தானவர் புரங்களை யெரியத்தன்பு யத்துறத் தடவரை வளைத்தவன் தக்கதென்ற மிழ்க்கலை தெரிந்தவர் பொருந்திய தேவூர்அன்பன் சேவடி யடைந்தனம் அல்லலொன் றிலமே

   “Vaṉpu yaththavath thāṉavar puraṅkaḷai yeriyath

   thaṉpu yaththuṟath thaṭavarai vaḷaiththavaṉ thakka

   theṉtṟa mizhkkalai therinthavar porunthiya thēvūr

   aṉpaṉ sēvaṭi yaṭainthaṉam allaloṉ tṟilamē”.

   வலியதோள்களை உடைய அவுணர்தமபுரங்கள் எரியுமாறு தன்தோள்களால் பெரிய மேருமலையை வில்லாகப் பொருந்த வளைத்தவனும், தென்தமிழ்க் கலைகளை நன்குணர்ந்தவர் வாழும் தேவூரில் விளங்கும் அன்பனுமாகிய சிவபிரானின் சேவடிகளை அடைந்தோம். ஆதலால் அல்லல்கள் சிறிதும் இலரானோம்.

8. 08

   தருவு யர்ந்தவெற் பெடுத்தஅத் தசமுகன் நெரிந்துவெருவ வூன்றிய திருவிரல் நெகிழ்த்துவாள் பணித்தான்தெருவு தோறும்நல் தென்றல்வந் துலவிய தேவூர்அரவு சூடியை அடைந்தனம் அல்லலொன் றிலமே

   சிறப்புடைய மரங்கள் உயர்ந்து வளர்ந்த கயிலை மலையைப் பெயர்த்தெடுத்த பத்துத் தலைகளை உடைய இராவணன் நெரிந்து வெருவுமாறு ஊன்றிய கால்விரலை, அவன் பாடல் கேட்டு நெகிழச்செய்து அவனுக்கு வாள் முதலியவற்றை வழங்கியவனும், தெருக்கள் தோறும் நல்ல தென்றல் வந்துலவும் தேவூரில் பாம்பணிந்தவனாய் விளங்குவோனுமாகிய சிவபிரானைச் சரணாக அடைந்தோம். ஆதலால் அல்லல்கள் இலரானோம்.

9. 09

   முந்திக் கண்ணனும் நான்முக னும்மவர் காணாஎந்தை திண்டிறல் இருங்களி றுரித்தஎம் பெருமான்செந்தி னத்திசை யறுபத முரல்திருத் தேவூர்அந்தி வண்ணனை யடைந்தனம் அல்லலொன் றிலமே

   “Munthik kaṇṇaṉum nāṉmuka ṉum'mavar kāṇā

   enthai thiṇṭiṟal iruṅkaḷi ṟuriththa'em perumāṉ

   senthi ṉaththisai yaṟupatha muralthiruth thēvūr

   anthi vaṇṇaṉai yaṭainthaṉam allaloṉ tṟilamē”.

   திருமால் பிரமர்கள் அடிமுடிகாண்போம் என முற்பட்டுத் தேடிக் காணாது தொழுத எந்தையும், திண்ணிய வலிமை பொருந்திய பெரிய யானையை உரித்த எம்பெருமானும், செந்து என்னும் இசைவகையை இசைத்து வண்டுகள் முரலும் தேவூரில் விளங்கும் அந்திவண்ணனும் ஆகிய சிவபிரானைச் சரணாக அடைந்தோம். ஆதலால் அல்லல்கள் இலரானோம்.

10. 10

    பாறு புத்தருந் தவமணி சமணரும் பலநாள்கூறி வைத்ததோர் குறியினைப் பிழையெனக் கொண்டுதேறி மிக்கநஞ் செஞ்சடைக் கடவுள்தென் தேவூர்ஆறு சூடியை யடைந்தனம் அல்லலொன் றிலமே

    ஓடித் திரியும் ‘புத்தர்களும், தவத்தை மேற்கொண்ட சமணரும் பலநாள்களாகக் கூறிவரும் இலக்குப் பிழையானது எனத் தௌவுற்று, எங்கும் மிகுந்து தோன்றும் நம் செஞ்சடைக் கடவுள் எழுந் தருளிய தேவூரை அடைந்து கங்கையை அணிந்துள்ள சிவபிரானைச் சரணாக அடைந்தோம். ஆதலால் அல்லல்கள் சிறிதும் இலரானோம்.

11. 11

    அல்ல லின்றிவிண் ணாள்வர்கள் காழியர்க் கதிபன்நல்ல செந்தமிழ் வல்லவன் ஞானசம் பந்தன்எல்லை யில்புகழ் மல்கிய எழில்வளர் தேவூர்த்தொல்லை நம்பனைச் சொல்லிய பத்தும் வல்லாரே

    இறுதிப் பாடல் நல்ல செந்தமிழ் வல்ல ஞானசம்பந்தனைக் குறிப்பிட்டு, தேவூர்ப் பழம்பெருமான் மீதான இப்பாடல்களை ஓத வல்லவர்கள் துன்பமின்றி விண்ணுலகை ஆள்வார்கள் என்று கூறுகிறது.

    காழிவாழ் மக்களுக்குத்தலைவனும், நல்ல செந்தமிழ் வல்லவனும் ஆகிய ஞானசம்பந்தன் எல்லையற்ற புகழ் பொருந்திய அழகிய தேவூரில் விளங்கும் பழமையான இறைவனைப் போற்றிப் பாடிய இப்பதிகப்பாடல்கள் பத்தையும் ஓதவல்லவர் துன்பங்கள் இன்றி விண்ணுலகை ஆள்வர்.