திருநெடுங்களம் ஸ்ரீ நெடுங்களநாதர் கோயில் காவிரித் தென்கரையின் 129 தலங்களில் 8-வது · சோழ நாடு

திருஞானசம்பந்தர் இக்கோயிலுக்கு வந்து இந்தப் பதிகத்தைப் பாடினார். பாடல் 1 / 11.

பாடலும் ஒலிபெயர்ப்பும் கட்டுரையில் உள்ளபடி. சொற்பொருளும் பொருளுரையும் AI உதவியுடன் எழுதிய வரைவுகள்.

பதினொரு பாடல்கள்

1. 01

   மறையுடையாய் தோலுடையாய் வார்சடை மேல்வளரும்பிறையுடையாய் பிஞ்ஞகனே யென்றுனைப் பேசினல்லால்குறையுடையார் குற்றமோராய் கொள்கையி னாலுயர்ந்தநிறையுடையார் இடர்களையாய் நெடுங்கள மேயவனே

   திருநெடுங்களம் மேவிய இறைவனே, வேதங்களைத் தனக்கு உடைமையாகக் கொண்டவனே, தோல் ஆடை உடுத்தவனே, நீண்ட சடை மேல் வளரும் இளம் பிறையைச் சூடியவனே, தலைக்கோலம் உடையவனே, என்று உன்னை வாழ்த்தினாலல்லது குறை உடையவர்களின் குற்றங்களை மனத்துக் கொள்ளாத நீ, மனத்தினால் உன்னையன்றி வேறு தெய்வத்தை நினையாத கொள்கையில் மேம்பட்ட நிறையுடைய அடியவர்களின் இடர்களை நீக்கி அருள்வாயாக.

2. 02

   கனைத்தெழுந்த வெண்டிரைசூழ் கடலிடை நஞ்சுதன்னைத்தினைத்தனையா மிடற்றில்வைத்த திருந்திய தேவநின்னைமனத்தகத்தோர் பாடலாடல் பேணி யிராப்பகலும்நினைத்தெழுவார் இடர்களையாய் நெடுங்கள மேயவனே

   திருநெடுங்களம் மேவிய இறைவனே, ஆரவாரித்து எழுந்த, வெண்மையான அலைகளால் சூழப்பட்ட கடல் நஞ்சினைத் தினையளவாகச் செய்து உண்டு கண்டத்தே நிறுத்திய மேம்பட்ட தேவனே, நின்னை மனத்தகத்தே நிறுவியவர்களின் ஆடல், பாடல்களை விரும்பி, இரவும் பகலும் நின்னையே நினைத்து எழும் அடியவர்களின் இடர்களை நீக்கி அருளுக.

3. 03

   நின்னடியே வழிபடுவான் நிமலா நினைக்கருதஎன்னடியான் உயிரைவவ்வேல் என்றடல் கூற்றுதைத்தபொன்னடியே பரவிநாளும் பூவொடு நீர்சுமக்கும்நின்னடியார் இடர்களையாய் நெடுங்கள மேயவனே

   திருநெடுங்களம் மேவிய இறைவனே, குற்ற மற்றவனே, நின் திருவடிகளையே வழிபடும் மார்க்கண்டேயன் நின்னையே கருதிச் சரண் புக அவனைக் கொல்லவந்த வலிமைபொருந்திய கூற்றுவனைச் சினந்து, என் அடியவன் உயிரைக் கவராதே என்று உதைத்தருளிய உன் பொன்னடிகளையே வழிபட்டு, நாள்தோறும் பூவும், நீரும் சுமந்து வழிபடும் உன் அடியவர்களின் இடர்களைக் களைந்தருள்வாயாக.

4. 04

   மலைபுரிந்த மன்னவன்றன் மகளையோர் பால்மகிழ்ந்தாய்அலைபுரிந்த கங்கைதங்கும் அவிர்சடை ஆரூராதலைபுரிந்த பலிமகிழ்வாய் தலைவநின் றாள்நிழற்கீழ்நிலைபுரிந்தார் இடர்களையாய் நெடுங்கள மேயவனே

   திருநெடுங்களம் மேவிய இறைவனே, இமவான்மகளாகிய பார்வதி தேவியைத் தன் திருமேனியின் ஓர் பாதியாகக் கொண்டு மகிழ்பவனே, அலைகள் வீசும் கங்கை நீரைத் தாங்கிய விரிந்த சடையினையுடைய திருவாரூர் இறைவனே, தலையோட்டை விரும்பி ஏந்தி அதன்கண் பலியேற்று மகிழ்பவனே, தலைவனே, நினது திருவடி நீழற்கீழ் நிற்றலையே விரும்பும் அடியவர்களின் இடர்களைப் போக்கி அருள்வாயாக.

5. 05

   பாங்கினல்லார் படிமஞ்செய்வார் பாரிட மும்பலிசேர்தூங்கிநல்லார் பாடலோடு தொழுகழ லேவணங்கித்தாங்கிநில்லா அன்பினோடுந் தலைவநின் றாள்நிழற்கீழ்நீங்கிநில்லார் இடர்களையாய் நெடுங்கள மேயவனே

   திருநெடுங்களம் மேவிய இறைவனே, குணங்களால் நல்லவர்களும், தவ வேடம் தாங்கியவர்களும் பாரிடை வாழும் மக்களும் பலருடைய இல்லங்களிலும் பலிதேரும் உனது செயல்களில் மனம் ஒன்றி நல்லோர் பாடும் பாடல்களோடு தொழத்தக்க உன் திருவடி வணங்கிக் கரை கடந்த அன்போடு தலைவனாகிய உனது திருவடிகளை நிழலை நீங்கி நில்லாதவர்களாகிய அடியவர்களின் இடர்களைக் களைந்தருள்வாயாக.

6. 06

   விருத்தனாகிப் பாலனாகி வேதமோர் நான்குணர்ந்துகருத்தனாகிக் கங்கையாளைக் கமழ்சடை மேற்கரந்தாய்அருத்தனாய ஆதிதேவன் அடியிணை யேபரவும்நிருத்தர்கீதர் இடர்களையாய் நெடுங்கள மேயவனே

   திருநெடுங்களம் மேவிய இறைவனே, மூத்த வேடந்தாங்கியும், இளமை வடிவங் கொண்டும், வேதங்கள் நான்கையும் நன்குணர்ந்த தலைவனாய் கங்கை நங்கையை மணம் கமழும் சடைமிசைக் கரந்துள்ள பெருமானே, கலை ஞானங்கள் மெய்ஞானங்களின் பொருளான முதற்கடவுளாய் உன் அடி இணைகளைப் பரவி ஆடியும் பாடியும் போற்றும் அடியவர்களின் இடர்களைப் போக்கியருள்வாயாக.

7. 07

   கூறுகொண்டாய் மூன்றுமொன்றாக் கூட்டியோர் வெங்கணையால்மாறுகொண்டார் புரமெரித்த மன்னவ னேகொடிமேல்ஏறுகொண்டாய் சாந்தமீதென் றெம்பெரு மானணிந்தநீறுகொண்டார் இடர்களையாய் நெடுங்கள மேயவனே

   திருநெடுங்களம் மேவிய இறைவனே, உமையம்மையைத் திருமேனியின் ஒரு கூறாகக் கொண்டவனே, அரி, எரி, காற்று ஆகிய மூன்றையும் ஒன்றாகக் கூட்டிய ஒப்பற்ற கொடிய அம்பினால் வேதவழக்கோடு பகை கொண்ட அசுரர்களின் முப்புரங்களையும் எரித்தழித்த மன்னவனே, கொடி மீது இடபத்தை இலச்சினையாகக் கொண்டவனே, இதுவே மணம் பொருந்திய சந்தனமாகும் என்று எம்பெருமானே நீ அணிந்துள்ள திருநீற்றை விரும்பி அணியும் அடியவர்களின் இடரை நீக்கியருள்வாயாக.

8. 08

   குன்றினுச்சி மேல்விளங்குங் கொடிமதிற் சூழிலங்கைஅன்றிநின்ற அரக்கர்கோனை அருவரைக் கீழடர்த்தாய்என்றுநல்ல வாய்மொழியால் ஏத்தியி ராப்பகலும்நின்றுநைவா ரிடர்களையாய் நெடுங்கள மேயவனே

   திருநெடுங்களம் மேவிய இறைவனே, மேருமலையின் சிகரங்கள் மூன்றில் ஒன்றாகிய குன்றின்மேல் விளங்குவதும் கொடிகள் கட்டப்பட்ட மதில்களால் சூழப்பட்டதுமான இலங்கை நகர் மன்னனும், உன்னோடு மாறுபட்டுக் கயிலை மலையைப் பெயர்த்தவனுமான அரக்கர் தலைவனாகிய இராவணனை அரிய அம்மலையின் கீழே அடர்த்தவனே! என்றெல்லாம் நல்ல தோத்திரங்களைக் கூறி இரவும் பகலும் உன்னையே ஏத்தி நின்று மனம் நையும் அடியவர்களின் இடர்களைப் போக்கியருளுவாயாக.

9. 09

   வேழவெண்கொம் பொசித்தமாலும் விளங்கிய நான்முகனுஞ்சூழவெங்கும் நேடவாங்கோர் சோதியு ளாகிநின்றாய்கேழல்வெண்கொம் பணிந்தபெம்மான் கேடிலாப் பொன்னடியின்நீழல்வாழ்வா ரிடர்களையாய் நெடுங்கள மேயவனே

   திருநெடுங்களம் மேவிய இறைவனே, கஞ்சனால் ஏவப் பட்டுத் தன்னைக் கொல்ல வந்த குவலயாபீடம் என்ற யானையின் கொம்புகளை ஒடித்த திருமாலும், புகழ்பெற்ற நான்முகனும், தங்களைச் சூழ்ந்துள்ள இடமெங்கும் தேடுமாறு இருவருக்கும் இடையே சோதிப் பிழம்பாய்த் தோன்றி நின்றவனே, பன்றியினதுகொம்பை அணிகலனாக அணிந்த பெருமானே, அழிவற்ற உன் பொன் போன்ற திருவடி நீழலில் வாழும் அடியவர்களின் இடர்களைக் களைந்தருள்வாய்.

10. 10

    வெஞ்சொல்தஞ்சொல் லாக்கிநின்ற வேடமி லாச்சமணுந்தஞ்சமில்லாச் சாக்கியருந் தத்துவ மொன்றறியார்துஞ்சலில்லா வாய்மொழியால் தோத்திரம் நின்னடியேநெஞ்சில்வைப்பார் இடர்களையாய் நெடுங்கள மேயவனே

    கொடுஞ் சொற்களையே தம் சொற்களாக்கிக் கொண்டு தமது வேடத்திற்குப் பொருந்தாமல் ஒழுகும் சமணரும் நற்சார்பில்லாத புத்தர்களும் சைவசமயம் கூறும் உண்மைப் பொருளை ஒரு சிறிதும் உணராதவர்கள். அவர்களை விடுத்து, திருநெடுங்களம் மேவிய இறைவனே! அழியாப் புகழுடைய வேதங்களோடு, தோத்திரங்களால் நின்னைப் பரவி நின் திருவடிகளை நெஞ்சில் கொண்டு வாழும் அடியவர்களின் இடர்களைப் போக்கியருளுவாயாக.

11. 11

    நீடவல்ல வார்சடையான் மேயநெ டுங்களத்தைச்சேடர்வாழும் மாமறுகிற் சிரபுரக் கோன்நலத்தால்நாடவல்ல பனுவல்மாலை ஞானசம் பந்தன்சொன்னபாடல்பத்தும் பாடவல்லார் பாவம் பறையுமே

    இறுதிப் பாடல் ஞானசம்பந்தனைப் பாடியவராகக் குறிப்பிட்டு, இப்பாடல்களைப் பாட வல்லவர்களின் பாவம் நீங்கும் என்று கூறுகிறது.

    மேலும் மேலும் நீண்டு வளரத்தக்க சடைமுடியை உடைய சிவபிரான் எழுந்தருளிய திருநெடுங்களத்தை, பெரியோர் பலர் வாழும் பெரிய வீதிகளை உடைய சிரபுரம் என்னும் சீகாழிப் பதியின் தலைவனாகிய ஞானசம்பந்தன் போற்றிப் பாடிய, நன்மைப் பொருளால் ஆராய்ந்து உணரத்தக்க இப்பாடல்கள் பத்தையும் பாட வல்லவர்களின் பாவங்கள் விலகும்.